تعال هنا ياولد.(تجيك ام كُلُعلُع) انشا الله... شوف بالله جنس الولد الممسوخ دا .(الله لا غزّا فيك بركةآ المطرطش آ المعولق)......
طبعاً يا جماعة ....كلكم زمان ( أو لحدّى هسى)☺ داعتكم حبّوبّاتكم جنس الدُعَا دا.... أو من فصيلتو...صاح ولاّ ما صاح ؟؟؟؟؟اسّى طبعا كلكم تنكروا وتعملوا فيها انو حبوباتكم ملائكة الرحمة!!!!!
الحبّوبّات وما أدراك ما الحبّوبَّات........ عالم قايم بى ذاتو...... رايكم شنو نقتحم جزء بسيط من عالم حبّوبّاتنا؟؟؟؟
يلا ارحكاكم .....ابقوا داخلين......
فى البدايه خلّونا نتكلم عن موضوع الدُعَا دا تحديداً...... بنلقى انو مافى حَبّوبَة مسالمة ومسكينة 100%...... بالتالى لمن تهيج لازم تفك آخِرا.... غايتو انا زمان لمن كنتا ادور اسمع لى دُعَا جديد بدوِّر ليك حبوبتى جنس دوير واقوِّما ليك بى نمره اربعه ..... أها وتعال شوف.... راجمات من العيار التقيل....تداعيك لمن تحلف تقول ا***** دى بتخسف بيك هسع دى......
وكدى لو اخدنا مثال لو حبوبتك كوركت ليك و جيتا بعد مسااااااااااافة....أها بعد تجيها تشبكك: انتا يا ولد اطرش؟؟؟؟؟ ( الطرش ال يقدِّد اضنيك ديل ان شا الله) اناديك من قبيل تجينى بعد ساعة ماشى تتقدَّل كَدِى تقول ماشيلَك فى شوك (تَمِش بطنك.. بركة الشيخ المكاشفى ).....
أمِش الجيران ديل قول لى حَجّة السُّرَة حبوبتى قالتلِك نَمِش على ناس المناسبة ديل متين؟ واوعك يا ولد أكان فتحت لك الباب بِنَّيتَا القشة ام روح دى ام عويناتن سُغار متل قدود الجلد دى توريها الجايبك شنو.... باقى هى سأآآآآآآآآلة (يسألا نكير بركة الله والرسول) الخبَّارة الشمشَارة.....
أها بعد تجى راجع وتديها الخبر انو حَجّة السُّرَة قالت انو المشى للعقد الساعه 4 ومُودِّيكم ولدا الدكتور بى عربيتوالجديدة....
الدُعَا بقلب 180درجة ...... انتا يا يابا ان شا الله تتبارك وما تتشارك ... وتتعَّلا وما تتدَّلا....وأكان نافعنى يا يابا وبتترسَّل لى
ان شا الله يعدلا عليك محل ما تقبِّل ... ويديك الفى مرادك.....
وطبعا يا اخواننا فى الدُعَا السمح دا الحبوبات برضهن ما بقصَّرن تب .... وأكان لحقن انبسطن منك و شكَّروك و دعن ليك دُعَا سمح على الايمان من كترت ما بتتكيف تقرب تركِّب ليك جناحين وتطير بيهن...
وبالمناسبة دى بنلقى انو الحبّوبّات وبى صِفَتِن شريحة مهمة من نساء السودان ... ليهن اعتقادات جازمة فى المشايخ والصوفية...... ونادراً ما نلقى لينا حبوبة ما (بتنده) ليها شيخ.... يا سيدى الحسن... يا الشيخ الجعلى..... يالشيخ الكباشى.......................الخ ..... اضف الى ذلك تعاملن المباشر مع الفُقَرَا والأفكِيَا (جمع فكى) فى معظم امور الحياة تقريباً...
وطبعا ًدا غير اعتقاداتن الدينية فى حاجات كتيرة.... واديكم مثال بى حالة السفر..غايتو انا لو جيت مسافرانشاالله مدنى القرييييييبة دى... حبوبتى عندها طقوس خاصة جداً فى طريقة الوداع....اول حاجة بتملا يدها رمله وبتجرها وتواسيها بى صورة منتظمة فى ا*****... وبتقول لى املص نعلاتك يا ولد( وطبعاً يا ولد دى... حتى لو عمرك 60 سنة برضو انتا لسه ولد) وقول بسم الله و امش فيها تلاتة خطوات بى كراعك اليمين اتجاه القبلة..... وهى بنتظرنى فى نهاية الخطوات دى بى كباية لبن لاااااااازم اشيل منها تلاتة جقمات كحد أدنى .... بعد داك هى بترجع تشيل الرملة الفيها خطواتى وتصرها فى قطعة....والكلام دا بيسموهو شيل القدم... أها بعد داك لمن انتهى من البروتوكولات دى كلمات الوداع ذاااااااتا مميزة(وداعة الالف الما بتنتلف... وداعة الله عند الرسول) طبعا هن بعتقدن انو شيل القدم دا هو البيحفظ الزول وبيجيبوا راجع تانى بالسلامة......
أها حبوباتنا ديل برضو عندهن تعليقاتن الخاصة جداً......نكتفى بى واااااااحد بس.... اللى هو تعليقن على الشفع السغار لمن يعملوا ليهم حاجة اكبر من عمرهم...... تلقى الحبوبة بتراقب ليك فى الموقف دا بى عين فاحصة جدا وتقول ليك ( شووووووووووف يا اخوانى ودابنآآآآآدم دا).
أما عالمن الخاص فبنلقاهو مليء بالمفارقات الطريفة.... يعنى مثلاً بنلقى انو فى كمية من الحبوبات بسفوا صعوط..... وتلقا الحُقَّة بتاعتا (علبة نيفيا كبييييييييرة) وهن طبعاً حنكن انو الصعوط بيشيل وجع الضرس... أها الحبوبة تلقاها تقوم من صباح الرحمن تطلِّع ليك حُقَّتا من تحت لحافا وتدردم ليها سفة قدر الليلة وبكره( عشان ضرسا ما يوجعا).
طبعا حبوباتنا العزيزات عندهن برضو حاجاتن البتشاءمن منها..... ومثلا اذا اتكلمنا عن أوقات الأعراس كمثال حى... بنلقى انهن ما بيخلن أفراد العائلة كان يكسروا رقبتم يعملوا عرس فى شهر الويحيد ( دا يعنى صَفَر فى الشهور العربية) وهن طبعا اصلا بتعاملن بالشهور العربية ... وكل شهر عربى عندهن ليهو اسم خاص بيهو.... أها الويحيد دا هن بيعتقدن بىانو لو عرستا فيهو بفترضو انك أكيد حتبَّكِر فيهو.... ولو دا حصل.... العارض بيركبك من ساسك لى راسك عمرك كلو.... وولدك الجبتو فيهو دا لازم كل سنة تَكِّرم ليهو بى ضبيحة وتوزعا على المساكين.. وأكان ما كرَّمتا بموت... وأها انتا تبقى كل سنة فى العيد ميلاد جاهز بالتورتة والخروف سوا.......وخروفك دا لازم يتربط فى البيت قبل ما تفكر تشترى للولد الهدية... عندى صاحبى بحكى لى انوهو عرس فى الويحيد و ولدو ولدوهو فى الويحيد... و الولد هسى عمرو سبعة سنين وهو لسة مواصل فى البرنامج دا بناءاً على التعليمات العليا.. وقال لى لكن بينى و بينك الحمد لله قدرتا أخفض العقوبة شوية لى بليلة ورز بى لبن....
وبرضوبقولن ما فىزول يعرس بين العيدين اطلاقاً ..... لاكن(( ياكافى البلا يا حايد المحن)) و((قَبُلُم وَحَّدُم)) الناس هسى مدّورِين ليك فى الاعراس دى على الطريقة الصاح وفى كل ايام السنة.. و بقو ما بعرفوا ليك حبوبة ولا ويحيد ولا بين عيدين ولا بتيخ..... انا هسع دي يوم وقفة الضحية الاخيرة دى حضرتا لي عرس!!!!..... وقبل كم سنة كدا سئيلى الله كان فى عرس فى رمضان عدييييييييييييل كده......أها فى اكتر من كدا ؟؟؟؟؟؟؟؟؟؟
الحبوبات يا اخواننا علاجن براهو ..... ادوية بلدية وأعشاب وزيت سمسم وكركدى وقرض وحلبة و....و...و...!!!!!
وأكلن براهو ..... كسره وملاح وعصيدة ...... فطور وغدا وعشا وسحور ذاتو !!!!!
ورقادن براهو...... فى الحوش فى هبوب الله السمحة دى فى العنقريب اب كراب.. واللحاف والوسادة!!!!!
وكل شى كل شى فى عالم حبوباتنا مختلف مختلف لكنه جميل جميل!!!!!......!!!!!!!
موضوع: كلام حبوووووبات 
الجمعة أغسطس 22, 2008 8:46 pm
